DAWN Microfinance ကုမ္ပဏီ၏ ဝန်ထမ်းမိသားစုများ စုပေါင်း၍ “စုပေါင်းမဟာဘုံကထိန်” လှူဒါန်းပွဲ အခမ်းအနားကို နိုဝင်ဘာလ (၃)ရက်နေ့ က ရန်ကုန်တိုင်းဒေသကြီး၊ ဒဂုံမြို့သစ်(အရှေ့ပိုင်း)မြို့နယ်ရှိ မဟာဂန္ဓာရုံကျောင်းတိုက်၌ ကျင်းပပြုလုပ်ခဲ့ပါသည်။
အလှူအခမ်းအနား ပထမပိုင်းအဖြစ် နံနက်ပိုင်းတွင် ကြွရောက်လာကြသော ဧည့်ပရိတ်သတ်များက သီလခံယူခြင်း၊ ပရိတ်တရားတော်များနာကြားခြင်းနှင့် ပင့်သံဃာတော်များအား ဆွမ်း၊ သင်္ကန်း၊ ဆေး နှင့် နဝကမ္မ လှူဖွယ်ပစ္စည်းအစုစုတို့ကို လှူဒါန်းခဲ့ကြပါသည်။
အလှူအခမ်းအနား ဒုတိယပိုင်းတွင် ကျောင်းရှိသံဃာတော် အရှင်သူမြတ်တို့အား ကိုယ်တိုင်ကိုယ်ကျ နေ့ဆွမ်းဆက်ကပ်ခြင်းနှင့် ကြွရောက်လာကြသော ဝန်ထမ်းမိသားစုများနှင့် ဧည့်ပရိတ်သတ်များကိုလည်း နေလည်စာဖြင့် တည်ခင်းဧည့်ခံကျွေးမွေးခဲ့သည်။ ထို့နောက် ဆရာတော် သံဃာတော်များက ပရိတ်တရားတော်မြတ်နှင့် ယခုကဲ့သို့ ကထိန်ခင်းခြင်းကြောင့် ရဟန်းတော်များ ရရှိခံစားရသည့် ကထိန်အာနိသင် အကျိုး (၅)ပါးတို့ကို ဟောကြားချီးမြှင့်ပေးခဲ့ပြီး ကထိန်ရေစက်ချတရားနာခြင်းများကို ပြုလုပ်ခဲ့ကြသည်။ ထို့အပြင် ကုမ္ပဏီဝန်ထမ်းများက ဆရာတော် သံဃာတော်တို့ကို ကထိန်ဉာတ်သင်္ကန်း၊ ဆန်၊ ဆီ၊ ဆား၊ ဆေးနှင့် နဝကမ္မ လှုဖွယ်ဝတ္ထုအစုစုတို့ကို အသီးသီးလှူဒါန်းခဲ့ကြပါသည်။
ယခုကဲ့သို့လှူဒါန်းခဲ့သော DAWN Microfinance ကုမ္ပဏီ ဝန်ထမ်းများ၏ ကထိန်လှူဒါန်းရခြင်း ကုသိုလ်ကောင်းမှု အဖို့ဘာဂတို့ကို DAWN ၏ အဖွဲ့ဝင်များ နှင့်တစ်ကွ နတ်လူသတ္တဝါအပေါင်းတို့အား သာဓုခေါ်ဆိုနိုင်စေရန်အတွက် အမျှကုသိုလ် ပေးဝေလိုက်ရပါသည်။
